ՀՀ բնապահպանության և ընդերքի տեսչական մարմինը ներկայացրել է մթնոլորտային օդի պահպանության ուղղությամբ 2022թ. ընթացքում իրականացրած վերահսկողության արդյունքները։ Ըստ տեսչական մարմնի հաղորդագրության՝ 2022թ. ընթացքում հայտնաբերվել է 179 իրավախախտում, կայացվել է 154 վարչական տույժ նշանակելու մասին որոշում: Որոշումներով նշանակված տուգանքի չափը կազմել է 13.000.000 ՀՀ դրամ: Հաշվարկված շրջակա միջավայրին պատճառված վնասի հատուցման չափը կազմել է 198.171.172 ՀՀ դրամ։
Փոշու արտանետումների նվազեցմանն ուղղված կանխարգելիչ լայնածավալ միջոցառումների արդյունքում հայտնաբերված առանց փոշու համար անթափանց ծածկոցների սորուն նյութերի տեղափոխման 77 դեպքով նշանակվել է 3.850.000 ՀՀ դրամի վարչական տուգանք։ Բացահայտվել է առանց անշարժ աղբյուրներից աղտոտող նյութեր մթնոլորտ արտանետելու չափաքանակների թույլտվության գործունեության 13 դեպք։ Բոլոր դեպքերով գործողությունները կասեցվել են։ Սահմանված կարգով համապատասխան թույլտվություն ձեռքբերելուց հետո 9-ի կասեցումը հանվել է։
Շինարարական 10 կազմակերպության նկատմամբ նշանակվել է 1.500.000 ՀՀ դրամի չափով վարչական տուգանք։
Հողի բերրի շերտի ապօրինի տեղափոխման 20 դեպքով նշանակվել է 2.240.000 դրամի չափով վարչական տուգանք, հաշվարկվել՝ 3.080.303 ՀՀ դրամի շրջակա միջավայրին պատճառված վնաս։
Լուսանկարը՝ ՀՀ բնապահպանության և ընդերքի տեսչական մարմնի